Претседателот на Европскиот совет, Шарл Мишел, денеска во Брисел изјави дека самитот Европска Унија – Западен Балкан ја потврдува цврстата посветеност на Унијата да ги види земјите од регионот како членки, но дека се очекува земјите од регионот да го забрзаат процесот на реформи.
-Очекуваме повеќе реформи од земјите од регионот на Западен Балкан, особено на полето на владеењето на правото и независноста на судството. И нашата страна ќе го направи својот дел, затоа започнавме стратешка дебата на ниво на лидери, за да идентификуваме што треба да направиме, рече Мишел пред почетокот на самитот, пренесе Бета.
Тој додаде дека сака да види повеќе инвестиции и економски развој за што поскоро да се видат позитивните ефекти од интеграцијата на терен.
-Најважно за ЕУ е да останеме обединети. Процесот на проширување останува да се тера врз основа на заслуги, кои уште еднаш ќе им ги објасниме на нашите партнери од Западен Балкан. Го знаете мојот личен став дека мора да бидеме подготвени до 2030 година и дека двете страни мора да вложат напори, рече Мишел.
Денеска во Брисел се одржува самитот Европска Унија – Западен Балкан, чиј фокус е натамошното зближување на двете страни, но и разгледување на одредени спорни прашања. (МИА)