Епидемиолошката состојба во Албанија почна да се влошува, бидејќи циркулираат грип, Ковид-19 и многу вируси, објави Топ чанел.
Според истиот извор забележан е првиот случај на загуба на живот како последица на грип. Станува збор за повозрасен маж од јужниот град Ѓирокастро.
-Седумдесетгодишниот маж се јавил во болницата во Ѓирокастро со симптоми на грип, треска, проблеми во белите дробови. Но, неговата здравствена состојба се влошила по што бил препратен во Инфективната болница во Тирана, каде што пристигнал интубиран. Но и покрај напорите на лекарите, починал, додава телевизијата.
Епидемиолошката состојба, како што потврди Институтот за јавно здравје, почна да се влошува кон крајот на минатиот месец, кога почнаа да се зголемуваат случаите на грип и на Ковид-19.
На неделно ниво имаше регистриани по 11 илјади случаи на респираторни инфекции, но според Институтот, бројот на заразени бил поголем, бидејќи „многу луѓе не се јавуваат на лекар, а дел се третираат со терапија дадена за член на семејството“.
Сега, бројот на неделно ниво, е поголем за најмалку 2.000 заразени од грип и Ковид-19 и истиот постојано се зголемува, поради што надлежните апелираат повозрасните граѓани да се имунизираат против грип, а сите да избегнуваат собирања.