Најголемиот брод за крстарење во светот, кој е пет пати поголем од легендарниот Титаник, е во завршна фаза на подготовка и ќе исплови следната година.
Наречен Icon of the Seas, нарачан од Royal Caribbean International, крузерот официјално ќе исплови во јануари 2024 година во Мајами.
Овој фантастичен брод е резултат на седумгодишна работа и 900 дена проектирање и изградба, а во овој процес учествуваа илјадници експерти.
Icon of the Seas ќе биде најголемиот патнички брод за крстарење некогаш изграден, со 18 патнички палуби, седум базени, повеќе од 40 ресторани и барови. Неговиот капацитет е 5.610 гости и може да се пофали со значителна бруто-тонажа од 250.800 тони. Вкупната должина на бродот за крстарење е 365 метри.
Луксузното одморалиште всушност се состои од осум уникатни „населби“ кои нудат препознатливи искуства, можности за забава и јадење. Соборувајќи рекорди, овие населби внесуваат неколку новитети. Островот Thrill го има најголемиот воден парк на еден брод за крстарење, првиот тобоган на отворено море со слободен пад, како и највисокиот тобоган во индустријата.
Chill Island нуди базени со поглед на океанот и коктел барови, додека The Hideaway го има првиот „бесконечен“ базен на море. Овој простор е опкружен со тераса на повеќе нивоа наменета за сончање, има када за хидромасажа, како и шанк. Останатите одморалишта вклучуваат Surfside и Aqadome, кој има свој AquaTheater.
Овој брод за крстарење може да користи течен природен гас (LNG) и интегрира различни мерки за енергетска ефикасност и врвни еколошки програми, вклучително и постројка од отпад до енергија на море.
Крузерот е енергетски поефикасен за 34 проценти од денешните стандардни. Цената на крстарење по лице се движи од 1.800 до речиси 2.200 долари.