Седум лица загинаа, а еден е тешко повреден вчера кога приватен авион се урна за време на полетувањето од аеродромот Бангор во американската држава Мејн, соопшти денес Федералната администрација за воздухопловство (ФАА).
Падот на двомоторниот авион на меѓународниот аеродром Бангор се случил околу 19:45 часот по локално време вчера, се вели во соопштението.
Падот се случил за време на силна снежна бура што се движеше низ североисточниот дел на САД.
Температурите се далеку под нулата во Мејн, а снегот предизвика многу ниска видливост.
Неколку минути пред падот, контролорите на летање и пилотите на аеродромот Бангор можеа да се слушнат како разговараат за лошата видливост, според аудио записот добиен од порталот LiveATC.net.
Контролорот на летање му дозволи на пилотот да полета од пистата 33 во Бангор.
Две минути подоцна, контролорот преку радио сигнал изјавил дека целиот сообраќај на пистата е запрен.
Неколку моменти подоцна, се слушнал друг контролор како вели дека патничкиот авион е превртен наопаку.
Потоа аеродромот бил затворен, а на возилата за итни случаи им било дозволено да се движат низ аеродромот.
Контролорот подоцна изјавил дека на авионот имало три члена на екипажот и можеби пет патници.