На Волстрит цените на акциите нагло паднаа бидејќи надежите на инвеститорите дека американската централна банка ќе ги намали каматните стапки во мај избледеа по податоците за неочекуван пораст на инфлацијата во САД.
Dow Jones загуби 1,36 отсто, на 38.275 поени, додека S&P 500 се лизна за 1,37 отсто, на 4.953 поени, а индексот Nasdaq се намали за 1,79 отсто, на 15.659 поени.
Остриот пад на индексот е резултат на податокот дека во јануари потрошувачките цени пораснале за 0,3 отсто на месечно и 3,1 отсто на годишно ниво, повеќе од очекувањата на аналитичарите.
Во последниве месеци цените на акциите силно пораснаа бидејќи пазарот процени дека инфлацијата ќе ослаби и дека како резултат на тоа ФЕД ќе почне да ги намалува каматните стапки веќе во март.
Сепак, имајќи предвид дека инфлацијата сè уште се движи далеку над целното ниво на ФЕД од 2 отсто, на пазарот веќе не се ни споменува мартовскиот пад, а по вчерашниот извештај за потрошувачките цени, надежите за намалување на каматните стапки во мај исчезнаа.
На пазарот на пари, шансите за намалување на стапката на ФЕД во мај сега се проценуваат на околу 36 отсто, додека пред вчерашниот извештај шансите беа околу 58 отсто.
„Многу претставници на ФЕД на различни начини во последните недели велат дека очекувањата на пазарот за намалување на стапката во првата половина од годината се предвремени. Извештајот за потрошувачките цени сега го потврди тоа“, рече Боб Елиот, директор во Unlimited Funds.
На крајот на минатата недела, индексот S&P 500 за првпат се проби над нивото од 5000 поени, а блиску до рекордни нивоа беа и Dow Jones и Nasdaq индексот.
Останува да се види дали индексите можат да ги повратат вчерашните загуби во наредните денови или ќе следат дополнителни надолни корекции на цените на акциите.
Цените на акциите вчера паднаа и на европските берзи. Лондонски FTSE индексот ослабе за 0,81 отсто, на 7.512 поени, додека франкфуртски DAX се лизна за 0,92 отсто, на 16.880 поени, а париски CAC 0,84 отсто, на 7.625 поени.