Францускиот ракометен гигант Нант вечерва пред својата публика ќе го пречека тимот на Шартр, а во пресрет на овој натпревар домашниот клуб ќе организира специјална церемонија во чест на 70. роденден на клубот.
Нант веќе подолго време важи за еден од најдобрите клубови во својата земја, а во последните години бележи и забележителни успеси на меѓународна сцена. Дресот на овој клуб во минатото го носеле многу ракометни ѕвезди, а меѓу нив секако е и нашиот Кирил Лазаров.
Македонскиот селектор цели пет сезони ги бранеше боите на Нант, остави длабока трага во клубот и таму ја заврши блескавата кариера. Раководството на Нант не го заборави продинесот на македонскиот ас и по тој повод го смести меѓу најголемите легенди на клубот.
Лазаров со уште шест други ракометари се веќе ставени на таканаречениот „Ѕид на шампионите“ во домот на Нант. Лазаров со Нант играше и во финалето на Лигата на шампионите, во сезоната 2017/18 кога беа поразени од Монпелје.