Светскиот рекет број еден Новак Ѓоковиќ изјави дека го смета Рафаел Надал за свој главен ривал и му посака брзо враќање на турнирите.
– Се надевам, за доброто на тенискиот свет, дека ќе може да игра што е можно повеќе во текот на целата сезона. Не знам како се чувствува, но судејќи по неговите зборови, тој е подготвен да се врати и, можеби, ќе го направи тоа во Австралија, изјави Ѓоковиќ за шпански „AS“.
На 19 ноември, 36-годишниот српски тенисер по седми пат во кариерата го освои завршниот АТП турнир, победувајќи го во финалето 22-годишниот Италијанец Јаник Синер со 6:3 и 6:3.
Ѓоковиќ рекордна осма година завршува како светски рекет број еден. (МИА)