Инсталациите на СДСМ и ДУИ се жилави и ќе биде жестока борбата со нив, не очекувам дека ќе биде лесна и во обвинителството и во судството. Нивната цел да дадат се од себе за да го уништат обвинителството и судството за да можат нивните вистински стопани, тие малкумина судии и обвинии да ги заштитат, добива епски размери. Ова го зборував и на последната собраниска седница кога одговарав на пратенички прашања, истакна премиерот Христијан Мицкоски по реакцијата на ДКСК за именување на членови од Судскиот совет и Советот на јавни обвинители во Академијата за судии и обвинители.
Според Мицкоски, во изминатите пет месеци од владеењето на новата Влада, често се случува некои од обвинителите да имаат стомачни проблеми, главоболки и температура, во момент кога треба да се преземе акција против криминалци кои биле симбол на, како што вели, минато седумгодишно владеење кое не треба да се повтори.
-Не верувам дека оваа борба ќе биде кратка, ќе биде долга и исцрпувачка. Малкумина се во судството и Обвинителството, но можам да кажам дека ќе победиме. Тие ќе бидат поразени, а македонските граѓани ќе добијат правда каква што заслужуваат, а не неправда од страна на опструирани послушници на минатата власт, рече Мицкоски при посетата на Тутунски комбинат АД Прилеп.
Судскиот совет и Советот на јавни обвинители да преземат мерки со кои ќе ги стават вон сила одлуките со кои нивните членови се назначени за членови на Управниот одбор на Академијата за судии и јавни обвинители (АСЈО), одлучи и објави ДКСК во петокот.
Според антикорупционерите, одлуките се спротивни на Законот за спречување на корупција и судир на интереси и на Законот за Академијата за судии и јавни обвинители.
Од Антикорупциска истакнаа дека согласно членот 44 од Законот за спречување на корупција и судир на интереси, членовите на Судскиот совет и на Советот на јавни обвинители не смеат во исто време да вршат функции во органите на управување кои располагаат со државен капитал. Судирот на интереси се јавува бидејќи Управниот одбор на Академијата одлучува по жалбите на кандидатите за судии и јавни обвинители, а советите ги избораат.