Воздухопловна база во близина на Дубаи, која ја користат австралиските сили, била погодена од дрон, изјави утрово австралискиот министер за одбрана Ричард Марлс.
Оперативниот штаб на Австралија, воздухопловната база „Ал Минхад“, бил погоден во саботата, изјави Марлс на новинарите.
– Сите Австралијци кои се таму се безбедни и евидентирани. Нема повредени Австралијци – рече тој.
Австралија има повеќе од 100 припадници на персонал низ Блискиот Исток, а повеќето се стационирани во Обединетите Арапски Емирати, изјави Марлс.
Министерката за надворешни работи, Пени Вонг, ги советуваше Австралијците да не патуваат во голем дел од Блискиот Исток.
– Знаеме дека ова е тешко време за многу Австралијци, особено за оние кои имаат семејства во регионот или планирани патувања – напиша таа на Х.
– Наш приоритет е безбедноста и сигурноста на Австралијците. Ќе продолжиме да работиме тесно со авиокомпаниите и со туристичката индустрија – додаде Вонг.
САД и Израел во саботата почнаа сеопфатна офанзива против Иран во која беше убиен врховниот водач, ајатолахот Али Хамнеи. Техеран одговори со напади низ целиот регион, лансирајќи ракети кон американските бази во неколку заливски држави.