Германскиот канцелар Олаф Шолц ги отфрли предлозите дека Германија треба да има свои нуклеарни боеви глави.
-На Германија не и треба сопствено нуклеарно оружје“, истакна Шолц денеска за време на панел-дискусија и подвлече дека НАТО останува камен-темелник на европската безбедност.
Одговарајќи на прашање на конференцијата „Европа 2024“, Шолц рече дека и покрај одредени политички разлики меѓу САД и нивните европски партнери, трансатлантските врски остануваат силни.
-Можеби имаме различни геополитички оценки, но едно е сосема јасно, споделуваме вредности со демократијата и владеењето на правото. И тоа не прави различни од другите. Се разбира, ние сме посилни во трансатлантската Алијанса. Затоа, нема причина да се оспоруваат работи кои се толку вредни, а тоа се НАТО и трансатлантската соработка, рече Шолц.
Во последниве месеци, неколку германски политичари сугерираа дека Германија треба да го развие својот нуклеарен арсенал, заедно со партнерите од ЕУ, и да го намали своето наслонување на заштитата од САД. (МИА)