Како што конфликтот на Блискиот Исток се одвива и се заканува да се интензивира, прекините во поморската трговија преку Ормуската Теснина ризикуваат да создадат последователни ефекти што влијаат врз хуманитарните потреби и земјоделското производство во наредните месеци, соопшти денеска портпаролот на ОН Стефан Дижарик.
Иако Генералниот секретар е посветен на вложување максимални напори за постигнување сеопфатно и трајно решавање на конфликтот, неопходна е итна акција за ублажување на овие последици, нагласи тој.
За да се справи со овие предизвици, Генералниот секретар формираше посебна Работна група, предводена од заменик-генералниот секретар Хорхе Мореира да Силва, извршен директор на Канцеларијата на Обединетите нации за проектни услуги (UNOPS). Оваа Работна група ќе вклучува и претставници од Конференцијата на ОН за трговија и развој (UNCTAD), Меѓународната поморска организација (IMO) и Меѓународната стопанска комора (ICC). Дополнителни субјекти може да бидат поканети да учествуваат по потреба. Примарен фокус на Работната група е да развива и предлага технички механизми специјално дизајнирани за задоволување на хуманитарните потреби во врска со Ормуската Теснина.
„Црпејќи инспирација од релевантните иницијативи на ОН, вклучувајќи го Механизмот на ОН за верификација, инспекција и мониторинг за Јемен (UNVIM), Иницијативата за жито од Црното Море (BSGI) и Механизмот на ОН2720 за Газа, овој нов механизам за Ормуската Теснина има за цел да ја олесни трговијата со ѓубрива, вклучително и движењето на сродни суровини“, информира Дижарик.
Операционализацијата на механизмот ќе се изврши во тесна консултација со релевантните земји-членки со целосно почитување на националниот суверенитет и воспоставените меѓународни правни рамки, наведе портпаролот на ОН.
Доколку биде успешен, тоа би создало и доверба меѓу земјите-членки во дипломатскиот пристап кон конфликтот и би претставувало вреден чекор кон пошироко политичко решение.
Како дел од неговиот поширок мандат за мир, личниот претставник на генералниот секретар, Жан Арно, ќе го води политичкиот ангажман со релевантните земји-членки, поддржан од Работната група.