Нормализирано е снабдувањето со електрична енергија во Битола, изјави вечерва за Курир градоначалникот Тони Коњановски.
-Се работеше за испад на трафостаницата Битола 4. Околу 40 минути поголем дел од градот немаше струја, но по брзата интервенција на надлежните екипи снабдувањето со електрична енергија е воспоставено и нормализирано во целиот град, вели Коњановски.
Снежната покривка во Битола е околу 15 сантиметри, а градоначалникот вели дека улиците се проодни и нема застој во сообраќајот.
-Екипите беа излезени на терен и во градот. Во моментов снежни врнежи нема. Се функционира, на коловозите нема снег. Повеќе снег наврна во подпелистерските села, а зимската служба пристапи кон чистење на селата кои се на повисоките места, додава Коњановски кој посочува дека екипите ќе бидат на терен цела вечер.
Од РЦУК Битола претходно информираа дека прекини во снабдувањето со електричната енергија имало и поради снегот кој натежнал на каблите во градот и околината.