Претседателот на Постојаната анкетна комисија за заштита на човековите слободи и права и пратеник на Левица, Димитар Апасиев, попладнево ја прекина седницата на Комисијата, на чиј дневен ред беше претставката поднесена од Здружението на граѓани „16 март 2025 Кочани“ – познато како Здружение на родителите на загинатите деца во дискотеката „Пулс“.
Апасиев посочи дека продолжението на седницата, на кое се очекува усвојување на заклучоци, дополнително ќе биде закажано.
– Констатирам дека расправата по точката од дневниот ред е завршена. По исцрпната дискусија, ја прекинувам работата на денешната петта седница. За првото продолжение, на кое очекувам пратениците да усогласат и донесат соодветни ставови, мерки и заклучоци кои би ги предложиле на усвојување, дополнително ќе бидете навремено известени во координација со подносителите – рече Апасиев.
Пратеникот на Левица, Амар Мециновиќ, истакна дека централниот елемент на дискусијата треба да биде недостатокот на одговорност од страна на институциите.
– Кога се случи трагедијата, сите знаевме дека системот потфрлил. Проблемот е во тоа што институциите се изземени од одговорност заради приватниот интерес кој генерира пари на незаконски начин. Повредата на човековите права најчесто се случува токму поради желбата некој да оствари профит. Мене ми е апсурдно денеска да зборуваме за процедура – рече Мециновиќ.
На почетокот на седницата, Марија Петрушова, како претставник на Здружението „16 март 2025 Кочани“, потенцира дека трагедијата во „Пулс“ е системски проблем, а не само несреќен случај.
– Сме овде не само за да жалиме за нашите деца, туку и за да бараме правда за нив. Оваа трагедија не е само поради една погрешно запалена искра, туку последица на системски пропусти кои го загрозуваат најосновното право – правото на живот. Нашите барања се: итна и целосна институционална поддршка за семејствата, јасен и официјален одговор за причините за доцнењето на институциите, утврдување рокови за завршување на сите постапки и разгледување на сите преостанати точки од поднесеното барање. Нашите деца го заслужуваат тоа – рече Петрушова.
Минатата недела, на предлог на пратениците од парламентарното мнозинство – ВМРО-ДПМНЕ, ЗНАМ и ВРЕДИ, Собранието донесе одлука за формирање Анкетна комисија која ќе го истражува постапувањето на институциите при трагедиите во Кочани, Модуларната болница, Дурмо турс и Ласкарци.
Судењето за пожарот во дискотеката „Пулс“, кој се случи на 16 март годинава и во кој загинаа 63 лица, а над 200 беа повредени, започна на 19 ноември во судницата на КПУ Идризово. Судењето се одвива под засилени безбедносни мерки со присуство на обвинетите, роднини на жртвите, обвинителството, одбраната и новинари. На обвинителна клупа се 37 лица – сопственици, управители, инспектори, поранешни градоначалници, обезбедувачи и државни службеници.