Градоначалничката на Град Скопје Данела Арсовска вчера била нападната во Чаир. Како нејзина поддшрка јавно се огласија само двајца и тоа: Бугарскиот пратеник во Европскиот парламент, Андреј Ковачев и претседателот на СДСМ, д-р Венко Филипче.
Бугарскиот пратеник во Европскиот парламент, Андреј Ковачев, денеска изрази сериозна загриженост за нападот врз градоначалничката на Скопје, Данела Арсовска, истакнувајќи дека таа е бугарска државјанка и дека веднаш треба да ѝ се обезбеди правна, конзуларна и морална заштита.
„Ова е уште еден случај на насилство, вознемирување и јавен линч врз бугарски државјани кои имаат високи јавни функции и бугарско државјанство врз основа на докажано бугарско потекло – само затоа што се изјасниле како Бугари,“ наведува Ковачев во својата објава.
Тој додава дека бугарската држава има обврска да ги заштити своите над 216.000 граѓани во Македонија, кои стекнале бугарско државјанство врз основа на документи за бугарско потекло и се изјасниле како етнички Бугари.
„Бугарија е должна да ги заштити нивните права, безбедност и човеково достоинство“, порача Ковачев.
Со свој став во одбрака на Данела изрази и Венко Филипче. Тој на својот фејсбук профил објави:
„Шест часа од бруталниот напад врз градоначалничката на Скопје, а од ВМРО-ДПМНЕ и Мицкоски сè уште нема ни збор за осуда. Молкот понекогаш зборува погласно од зборовите.
И не се работи само за напад врз градоначалничката и службениците од Градот. Се работи за тоа дали секој од нас може без страв да се спротивстави на криминалот.
Пораката што власта ја испраќа е дека секој кој ќе се обиде да го обелодени нивниот криминал ќе се соочи со опасност по личната безбедност. Ова е страшно и недозволиво.
За една година безбедносната состојба во државата катастрофално се влоши. Безбедноста на граѓаните, правдата, заштитата од институциите практично не постојат. Ова е нешто што треба сериозно сите да нè загрижи.
Барам итно да се осудат насилниците и барам итно да се поведе постапка против службениците на МВР кои не постапиле и не ги заштитиле претставниците на Градот“.
Според официјалните информации нападот во СВР Скопје го пријавило лице со иницијали А.Ј. ОД МВР велат дека Арсовска не сакала да го пријави настанот и се упатила во „8 Септември“.
-На 11.07.2025 во 12:15ч од страна на А.Ј. во СВР Скопје пријавено е дека при извршување работни задачи на ул.”Кумбара” физички била нападната градоначалничката на град Скопје Данела Арсовска и дека повеќе лица и упатувале вербални закани. Истата не сакала да поднесе пријава за настанот по што се упатила во ГОБ 8 Септември за укажување лекарска помош – се вели во информацијата од МВР.