Државната изборна комисија утрово во 9 часот треба да одржи јавна седница за објавување на конечност на резултатите за претседателски избори. Потоа Комисијата треба да достави извештај до македонското Собрание за да биде закажана седница за инаугурација на новата претседателка.
До Државната изборна комисија (ДИК) синоќа, на помалку од два часа до истекување на предвидениот рок во 22:30 часот не биле поднесени приговори за постапката за сумирање на резултатите за претседателските избори.
Од Комисијата вчера најавија дека доколку до завршувањето на рокот нема приговори, денеска ќе го достават извештајот со конечните резултати од претседателските избори до Собранието. Потоа се очекува претседателот на Парламентот, Јован Митрески да ја закаже седницата во недела напладне за инаугурација на новата претседателка Гордана Сиљановска Давкова.
По официјализирањето на изборните резултати, седницата за инаугурација на новата претседателка треба да биде свикана најдоцна на 12 мај. Таа пред пратениците од стариот состав треба да даде свечена изјава по која и започнува да тече нејзиниот мандат. На 12 мај истекува мандатот на актуелниот претседател, кој беше и кандидат за претседател, Стево Пендаровски.
Универзитетската професорка Гордана Сиљановска – Давкова ќе биде шестиот претседател на Северна Македонија и прва жена која е избрана на оваа позиција.
Сиљановска-Давкова поддржана од ВМРО-ДПМНЕ на вториот круг од Претседателските избори, го победи досегашниот претседател Стево Пендаровски.
Во кампањата која ја водеше под слоганот „Македонија повторно горда“, Сиљановска-Давкова говореше дека придавката „Северна“ нема да ја користи, но ќе стои пред табла со новото уставно име. Таа имаше изјавено и дека е против уставните измени за внесување на Бугарите во Уставот, но доколку Собранието донесе таква одлука ќе ја почитува, бидејќи Собранието е уставотворен орган. До граѓаните порачуваше дека треба да ги почитуваме темелните вредности на нашиот уставен поредок, а Преспанскиот договор за неа, како што велеше, е политички и правно отворено прашање.
Вечерта по изборите во изјавата во Централниот изборен штаб на ВМРО-ДПМНЕ, таа вети дека ќе биде претседател на сите граѓани.
-Јас тврдам дека ќе се однесувам како претседателка на сите граѓани. Тоа значи на сите етнички групи, на сите членови на партиите, на оние кои не се во партиите, бидејќи не може ниту еден претседател да трага по единство, ако држи партиски линии, изјави Сиљановска Давкова.
Сиљановска-Давкова е родена на 11 мај 1953 во Охрид. Основно и средно образование завршила во Скопје (1973). Дипломирала на Правниот факултет во Скопје (1978), каде што и магистрирала. Докторирала пред комисија предводена од проф. Франц Град со „Cum laude“ на Правниот факултет во Љубљана, на тема „Local Selfgovernment – between Norms and Reality“ во 1994.
Била избрана за асистент по предметот политички систем на Правниот факултет во Скопје (1989), за доцент по уставно право и политички систем (1994), а потоа и за редовен професор во 2004. Била член на Уставната комисија на Собранието на РМ (1990-1992) и министер во Владата на РМ (1992-1994). Експерт за избори на ООН и потпретседател на групата Независни експерти за локална самоуправа при Советот на Европа. Член на Венецијанската комисија. Автор е на стотина научни трудови за уставното право и политичкиот систем.
Сиљановска-Давкова беше канадидат на ВМРО-ДПМНЕ и на претседателските избори во 2019 година, но изгуби од Стево Пендаровски.
На Парламентарните избори во 2020 година, Силјановска-Давкова беше носител на кандидатскиот список за пратеници на ВМРО-ДПМНЕ и Коалицијата во Изборна единица 1. Од август 2020 година таа е пратеник во македонското Собрание.
На претседателската фотелја досега седнаа петмина претседатели. Првиот претседател Киро Глигоров и Ѓорге Иванов претседателската функција ја вршеа во два мандата, а по еден мандат имаа Борис Трајковски и Бранко Црвенковски, како и Стево Пендаровски.