Менаџерот на Манчестер Јунајтед, Ерик тен Хаг, ги отфрли критиките за перформансите на неговиот тим во победата од 4:2 во Премиер лигата над испаднатиот Шефилд Јунајтед. Холанѓанецот инсистира дека тимот имал целосна контрола врз играта и покрај тоа што заостанувале во два наврати.
Јунајтед имаше 72 проценти посед на топката и 25 удари кон голот, а победата стави крај на серијата од четири натпревари без победа во Премиер лигата.
-Имавме целосна контрола. Сигурно гледав поинаков натпревар, извинете. Двапати заостанувавме во резултатот, така што зборуваме за два негативни аспекти – едниот е фокусот, а другиот е дисциплината. Но, за останатите, мислам дека целосно ги контролиравме настаните на теренот. Тимот покажа издржливост. Не е лесно кога го губите натпреварот, но ние направивме пресврт против компактен тим. Ги надигравме. Бевме мирни, прокоментира Тен Хаг.
Домаќините си создадоа проблеми, Богл ја казни грешката на голманот Андре Онана за да го отвори резултатот за гостите.
-Мораме да ги запреме тие грешки. Не можете да правите такви грешки на највисоко ниво ако сакате да ги постигнете своите цели, ако сакате да освојувате трофеи. Животот е многу полесен кога не правите такви грешки, порача Холанѓанецот.
Менаџерот го пофали капитенот Бруно Фернандеш за неговите лидерски квалитети кои му помогнаа на Јунајтед да го сврти натпреварот. Португалецот се истакна со два гола и една асистенција.
-Тој покажува дека е лидер на тимот. Но и со својата енергија, во неговата транзиција во двете фази, тоа е многу важно. Тој се обидува да го охрабри тимот. Му оди многу добро и ние сме презадоволни од настапот и неговиот однос, рече Тен Хаг.