Јапонски суд денеска го осуди човекот обвинет за атентат врз поранешниот јапонски премиер Шинзо Абе на доживотна казна затвор.
Тецуја Јамагами, 45, призна дека го застрелал најдолгогодишниот повоен премиер на Јапонија со рачно изработено огнено оружје за време на говорот за изборната кампања во јули 2022 година. Насилната смрт на Абе предизвика светски шок.
Јамагами беше совладан и уапсен пред камери по убиството.
Јамагами наводно им кажал на истражителите дека дејствувал од омраза кон контроверзната Црква за обединување, која е основана во Јужна Кореја во 1954 година од страна на тврдокорниот антикомунист Сун Мјунг Мун, а во Јапонија е поддржана од дедото на Абе, поранешниот премиер Нобусуке Киши.
Мајката на Јамагами донирала големи суми пари на религиозната организација, што го оставило семејството во финансиска пропаст.
Атентатот врз Абе ги изнесе на виделина врските меѓу Црквата на обединување и членовите на неговата владејачка Либерално-демократска партија.