Американскиот претседател Доналд Трамп изјави дека е подготвен да се обврзе на учеството на САД во идната одбрана на Украина како дел од мировниот договор, бидејќи е уверен дека Русија нема да се обиде повторно да изврши инвазија.
„Многу сум уверен дека тие нема повторно да извршат инвазија, во спротивно не би се согласил на тоа“, рече тој во интервју за „Њујорк тајмс“, одговарајќи на прашањето дали е подготвен да влезе во војна за да ја одбрани Украина доколку Русија ги прекрши условите за прекин на огнот и повторно изврши инвазија.
Трамп рече дека верува оти рускиот претседател Владимир Путин е сè уште подготвен да склучи мир.
„Мислам дека тој (Путин) сака да склучи договор. Но, долго време размислував за тоа… Имав случаи каде што завршив сè со Путин, а (украинскиот претседател Володимир) Зеленски не сакаше да склучи договор, што ме шокираше. Потоа имав случаи каде што беше обратно. Мислам дека сега двајцата сакаат да склучат договор, но ќе видиме“, додаде американскиот лидер. Тој одби да даде временска рамка кога верува дека војната ќе заврши.
„Правиме сѐ што можеме. Немам временска рамка“, додаде тој. Трамп рече дека не е подготвен да вети зголемена поддршка од САД за Украина ако Путин продолжи да се спротивставува на прекинот на огнот.
„Едноставно не сакам да бидам во позиција да го кажам тоа, бидејќи имам обврска да видам дали можам да спасам животи“, рече тој.
На самитот во Париз претходно оваа недела, лидерите на Франција и Велика Британија ветија дека ќе обезбедат војници за да ја одвратат Русија од повторна инвазија ако се согласи на прекин на огнот.
Но, состанокот, на кој присуствуваа специјалниот претставник на Белата куќа, Стив Виткоф, и Џаред Кушнер, зет на претседателот, го остави нејасен обемот на поддршката на САД за таква мултинационална сила, објави „Њујорк тајмс“.
Виткоф рече дека групата „постигнала значителен напредок во неколку клучни области на работа“ што би биле дел од конечниот мировен договор. Руското Министерство за надворешни работи вчера изјави дека договорот за силите за поддршка на Украина претставува „милитаризација, ескалација и понатамошно влошување на конфликтот“.