Коча денеска се појави на суд и изрази жалење поради инцидентот што го предизвика минатиот месец кога по завршување на дуелот од турската Суперлига меѓу Анкарагучу и Ризеспор физички го нападна главниот судија Халил Умут Мелер.
Непосредно по последниот судиски свиреж, Коча втрча на теренот и со тупаница го удри во главата Мелер. Откако падна на земја, главниот судија уште неколку пати беше удрен со нога, а потоа пренесен во болница.
Првиот човек на Анкарагучу беше уапсен ден по инцидентот.
На судското рочиште Коча се извини за инцидентот, но негираше дека на Мелер му се заканил со убиство.
„Тоа беше прв пат во животот да се впуштам во физичка пресметка, но дел од обвинението не е точно. Не му се заканував на судијата Мелер дека ќе го убијам. Изразив жалење поради инцидентот и претходно, а тоа го повторувам и пред судот“ рече Коча.
Судскиот процес ќе продолжи на крајот на февруари.