Американскиот претседател во заминување Џозеф Бајден се кае што се повлече од претседателската трка и верува дека можел да го победи својот републикански ривал, изјавија извори од Белата куќа за „Вашингтон пост“.
Според нивните тврдења, Бајден смета и дека не требало да го назначи Мерик Гарланд за јавен обвинител на САД, бидејќи бавно го спроведувал процесот на гонење на Трамп за неговата улога во нападите врз Капитол во 2021 година.
Американското Министерство за правда под Гарланд го гонеше и синот на Бајден, Хантер, кој неодамна доби целосно помилување од неговиот татко.
Бајден се откажа од претседателската трка по лошиот настап во дебатата против Трамп во јуни и ја поддржа неговата потпретседателка, Камала Харис, која загуби од републиканецот на изборите во ноември, и покрај првичното водство во анкетите.
„Вашингтон пост“ објави дека Бајден и неговите соработници не ја обвинуваат Харис за поразот на демократите, но дека тие веруваат дека исходот би бил поинаков доколку актуелниот претседател останел демократски кандидат.
Тоа е став кој го оспоруваат многу поддржувачи на Харис, кои го обвинуваат претседателот за предолго чекање за да се повлече. (МИА)