Германија и Кенија денеска ја нагласија клучната улога на Обединетите нации во решавањето на глобалните тензии, во услови на загриженост дека американскиот претседател Доналд Трамп би можел да формира паралелно тело на долгогодишната меѓународна организација.
– Ние веќе имаме Одбор за мир, а тоа се Обединетите нации, изјави германскиот министер за надворешни работи Јохан Вадефул по средбата со кенијскиот премиер Мусалија Мудавади во Најроби.
Изјавата доаѓа во контекст на реакциите предизвикани од најавениот „Одбор за мир“ на Трамп, кој треба да ги надгледува напорите за повоена обнова во Појасот Газа. Повелбата на Одборот, која Трамп, според најавите, треба да ја потпише утре, предизвика сомнежи дека американскиот претседател планира проширување на мандатот на телото и на други конфликти, што би претставувало сериозен предизвик за ОН.
Иако призна дека на Обединетите нации им се потребни реформи, Вадефул изјави дека германскиот канцелар Фридрих Мерц се надева дека ќе ги разјасни „прашањата што ги имаме“ во врска со „Одборот за мир“ на Трамп на маргините на Светскиот економски форум во Давос.
Мудавади, кој е и министер за надворешни работи на Кенија, исто така ја нагласи важноста на ОН за решавање на меѓународните конфликти, додавајќи дека Кенија не била поканета да се приклучи на „Одборот за мир“.
– Од наша перспектива, како Кенија, важно е институции како Обединетите нации да се зајакнуваат, бидејќи целокупната глобална архитектура за мир е заснована врз рамката на ОН, изјави тој.
– Веруваме дека мултилатерализмот е вистинскиот пат. Ако има проблеми, подобро е да се реформираат ОН отколку да се создаваат паралелни процеси, ако сакаме координиран пристап, додаде Мудавади.
Вадефул денеска ја започна дводневната посета на Источна Африка, која опфаќа престои во Кенија и Етиопија. Во Најроби, германскиот министер треба да се сретне и со претседателот Вилијам Руто.
Според портпарол на германското Министерство за надворешни работи, посетата ќе биде фокусирана на билатералните односи, како и на регионалните и меѓународните безбедносни прашања.
Во светло на контроверзното барање на Трамп за преземање контрола врз Гренланд, за време на посетата ќе се разговара и за зачувување на меѓународниот поредок заснован на правила.
Вадефул, кој е придружуван и од економска делегација, ќе посети образовна институција управувана од германска компанија, како и меѓународен тренинг-центар за мировни иницијативи во Кенија.
Посетата продолжува утре со политички разговори во етиопската престолнина Адис Абеба и посета на седиштето на Африканската Унија.