Судија во Њујорк дозволи објавување на одредени документи поврзани со случајот на починатиот педофил Џефри Епстин, вклучувајќи транскрипти од големата порота и истражни досиеја.
Окружниот судија на САД, Ричард М. Берман, денеска пресуди дека материјалите мора да бидат објавени до 19 декември. Документите потекнуваат од случај од 2019 година пред њујоршкиот суд, во кој Епстин беше обвинет за сексуално искористување и злоупотреба на десетици малолетни девојки во текот на многу години во неговиот дом на Менхетен, во Палм Бич, Флорида и на други места.
Епстин, финансиер кој се дружел со богати и моќни луѓе, почина во неговата затворска ќелија во 2019 година на 66-годишна возраст, пред случајот да може да оди на судење. Обдукцијата ја класифицираше неговата смрт како самоубиство, потсетува ДПА.
Одлуката на судијата следи по барањето поднесено минатиот месец од американската влада. Претседателот Доналд Трамп претходно потпиша закон, под притисок на Конгресот, со кој се наложува обелоденување на документи и истражни досиеја поврзани со случајот „Епстин“.
Судијата Берман експлицитно се повика на новиот закон како оправдување за неговата пресуда.
Според обвинителите, Епстин водел операција за трговија со луѓе за сексуална експлоатација во која биле вклучени бројни млади жени, вклучувајќи и малолетнички. Тој исто така лично ги злоупотребувал жртвите.
Случајот првпат се појави пред судовите пред речиси две децении, кога Епстин се изјасни за виновен за одредени обвиненија. Години подоцна, случајот беше повторно отворен, а Епстин повторно беше уапсен – постапките на кои се однесува новонареденото објавување на документите.
Истиот њујоршки суд вчера одобри барање од Министерството за правда на САД за објавување на досиеја поврзани со долгогодишната соработничка на Епстин, Гислејн Максвел.