Планот на британскиот премиер Кир Стармер за меѓународни сили за поддршка на прекин на огнот во Украина беше отфрлен како „позирање“ од Стив Виткоф, специјалниот пратеник на Доналд Трамп.
Тој рече дека планот се заснова на „упростена“ идеја на премиерот на Велика Британија и другите европски лидери кои мислат „сите мора да бидеме како Винстон Черчил“.
Во интервју за новинарот кој го поддржува Трамп, Такер Карлсон, Виткоф го пофали Владимир Путин, велејќи дека „му се допаѓа“ рускиот претседател.
„Не го сметам Путин за лош човек. Тој е супер паметен“, рече Виткоф.
Виткоф, кој се сретна со Путин пред 10 дена, рече дека рускиот претседател бил „љубезен“ и „искрен“ со него. Тој додаде дека Путин му рекол дека се молел за Трамп по обидот за атентат врз него минатата година. Исто така, рече дека Путин нарачал портрет на американскиот претседател како подарок и дека Трамп бил „јасно трогнат од тоа“.
За време на интервјуто, Виткоф повтори различни руски аргументи, вклучително и дека Украина е „лажна земја“ и праша кога светот ќе ја признае окупираната украинска територија како руска.
Виткоф ги предводи преговорите за прекин на огнот меѓу САД со Русија и Украина, но не можеше да ги именува петте региони на Украина кои се или анектирани или делумно окупирани од руските сили.
САД деновиве ќе одржат одделни разговори со Украина и Русија во Саудиска Арабија за прекин на огнот.