Републиканците во американскиот Сенат ја отфрлија резолуцијата за воените овластувања што ќе ја ограничеше можноста на американскиот претседател Доналд Трамп да извршува понатамошни напади врз Венецуела откога Белата куќа изврши притисок врз неколку републикански сенатори, кои првично ја поддржаа мерката.
Републиканските сенатори Џош Холи од Мисури и Тод Јанг од Индијана вчера го променија својот став откога првично гласаа за усвојување на резолуцијата, објави „Си-би-ес њуз“.
Американскиот потпретседател, Џ.Д. Венс, мораше да интервенира за да го измени нерешениот резултат од 50-50.
Републиканците користеа процедурален маневар за да ја блокираат резолуцијата тврдејќи дека таа повеќе не треба да има статус на приоритетна, што ѝ дава приоритет на седницата, бидејќи САД во моментот не се вклучени во воени активности против Венецуела.
Лидерот на мнозинството во Сенатот, Џон Тун, од Јужна Дакота, го објави овој аргумент во обраќањето до Сенатот.
„Денес очекуваме гласање за резолуција со која се наредува повлекување на американските сили од конфликтот во или против Венецуела иако САД во моментот не се вклучени во воени активности таму. Немаме трупи на терен во Венецуела. Во моментот не спроведуваме воени операции таму“.
Сенаторите минатата недела усвоија резолуција предложена од демократот Тим Кејн од Вирџинија откако САД ги уапсија венецуелскиот претседател Николас Мадуро и неговата сопруга, Силија Флорес, а Трамп тврдеше дека САД сега ја контролираат земјата.
Пет републикански сенатори им се придружија на сите демократи во поддршката на резолуцијата, која беше усвоена по две претходни неуспешни иницијативи во Сенатот за ограничување на воените дејствија на Трамп во регионот.
Минатата недела Трамп ги критикува републиканците велејќи дека „никогаш повеќе не треба да бидат избрани на функција“.
Тој повторно ги критикува во вторникот за време на говорот во детроитскиот економски клуб нарекувајќи ги „вистински губитници“.
Некои сенатори рекоа дека добиле повици од Трамп и од американскиот државен секретар Марко Рубио пред вчерашното гласање.