Нов круг преговори за иранската нуклеарна програма ќе се одржи в петок во Истанбул помеѓу Иран и т.н. европска тројка – Германија, Франција и Обединетото Кралство, соопшти иранското Министерство за надворешни работи.
– Како одговор на барањето на европските држави, Иран прифати да учествува во нови преговори, изјави портпаролот на иранското МНР, Есмаил Багаи.
Западните земји и Израел долго време го обвинуваат Иран дека има намера да развие нуклеарно оружје – нешто што Техеран постојано го негира, тврдејќи дека нуклеарната програма има исклучиво мирољубиви цели.
На 13 јуни Израел изврши неочекуван напад врз Иран, во кој беа убиени високи воени лица и научници поврзани со нуклеарниот сектор. САД, поддржувајќи го сојузникот Израел, на 21 кон 22 јуни изведоа воздушни напади врз три ирански нуклеарни објекти.
Преговорите беа прекинати по тие напади, кои беа наредени од американскиот претседател Доналд Трамп. Последната средба меѓу Иран и европската тројка се одржа на 21 јуни во Женева, неколку часа пред американските бомбардирања.