Министрите за одбрана на НАТО денеска треба да одржат виртуелен состанок за идните безбедносни гаранции за Киев.
Италијанскиот адмирал Џузепе Каво Драгоне, претседател на Воениот комитет на НАТО, изјави дека 32-цата министри за одбрана на алијансата ќе одржат видеоконференција, бидејќи САД спроведуваат дипломатска иницијатива за прекин на војната во Украина.
Американскиот генерал Алексус Гринкевич, врховен командант на силите на НАТО во Европа, ќе учествува во разговорите, напиша Драгоне на „X“.
Европските сојузници на Киев се стремат да формираат сила што би можела да дејствува како гарант за каков било мировен договор, а коалиција од 30 земји, вклучувајќи ги европските земји, Јапонија и Австралија, ја поддржа иницијативата.
Воените шефови разработуваат како би можела да функционира таква безбедносна сила. Не е јасно каква улога би играле САД. Трамп вчера ја исклучи можноста за испраќање американски војници за да помогнат во одбраната на Украина од Русија. Русија постојано повторуваше дека нема да прифати војници на НАТО во Украина.
Претседателот на САД, Доналд Трамп, се сретна со рускиот претседател Владимир Путин во Алјаска минатиот петок, а во понеделникот беше домаќин на украинскиот претседател Володимир Зеленски и високи европски лидери во Белата куќа. Ниту еден од состаноците не донесе никаков опиплив напредок.
Трамп се обидува да ги насочи Путин и Зеленски кон договор повеќе од три години откако Русија започна офанзива против својот сосед, но постојат големи пречки. Тие вклучуваат барање на Украина за воени гаранции од Западот за да се осигури дека Русија нема да изврши уште една инвазија во годините што доаѓаат.
-Ни требаат силни безбедносни гаранции за да обезбедиме навистина безбеден и траен мир, рече Зеленски во објава на Телеграм денеска по руските напади во шест украински региони во текот на ноќта.