Нема геноцид во северна Нигерија, изјави синоќа шефот на дипломатијата на Џибути и претседател на Комисија на Африканската унија, Махмуд Али Јусуф, отфрлајќи ги обвинувањата на американскиот претседател Доналд Трамп дека „многу голем број“ христијани се убиваат во најнаселената африканска земја.
-Тоа што се случува во северниот дел на Нигерија нема никаква врска со видот на злосторства што ги гледаме во Судан или во некои делови од источен Конго, изјави Махмуд Али Јусуф пред новинарите во Обединетите нации во Њујорк, осврнувајќи се на Демократска Република Конго.
„Размислете двапати пред да давате такви изјави“, рече тој. „Најголемите жртви на Боко Харам се муслимани, а не христијани“.
Екстремистичката исламистичка вооружена група Боко Харам го тероризира североисточниот дел на Нигерија, во бунт во кој загинаа десетици илјади луѓе во текот на изминатите 15 години. Експертите за човекови права рекоа дека повеќето од жртвите на Боко Харам се муслимани.
Трамп претходно овој месец изјави дека побарал од Министерството за одбрана да се подготви за можна „брза“ воена акција доколку Нигерија не преземе мерки против убиствата на христијаните. Тој не даде никакви конкретни докази за своите обвинувања.
Тој, исто така, се закани дека „ќе ја запре целата помош за Нигерија и многу лесно би можел да влезе во оваа земја, „со оружје во рака“, за целосно да ги уништи исламските терористи кои ги извршуваат овие ужасни злосторства“.
Министерството за надворешни работи на Нигерија изјави дека земјата ќе продолжи да се бори против насилниот екстремизам и се надева дека Вашингтон ќе остане близок сојузник, велејќи дека ќе „продолжи да ги брани сите граѓани, без оглед на раса, вероисповед или религија“.
Нигерија, дом на 200 етнички групи кои практикуваат христијанство, ислам и традиционални религии, има долга историја на мирен соживот, но исто така доживеала избувнување на насилство меѓу групите, често пати влошено од етничките поделби или конфликти околу намалените ресурси.