Германскиот синдикат Верди ги повика вработените на „Луфтханза ерлајнс“ да организираат нов штрајк на главните германски аеродроми од денеска до петок, бидејќи останува незадоволството во преговорите за зголемување на платите.
Верди објави дека не е постигнат договор во последната рунда преговори и додаде дека повикува на штрајк од денеска во 6 часот по локално време до петок во 23:59 часот.
Синдикатот наведува дека патниците нема да бидат погодени од штрајкот.
Верди бара зголемување на платата за 12,5 отсто, со најмалку 500 евра повеќе веднаш на месечниот список, како и бонус за инфлација од 3.000 евра.
Целта е да се неутрализира инфлацијата од последните години во Германија, која минатата година достигна 5,9 отсто, по 6,9 отсто во 2022 година.
-Последната понуда на Луфтханза вклучуваше долгорочно зголемување на платите, но не ги исполни другите барања на синдикатот, рече Верди.
Следната рунда преговори ќе се одржи на 13 и 14 март.
На почетокот на февруари, еднодневен штрајк на копнениот персонал на Луфтханза ги прекина летовите на авиокомпанијата. Околу 100.000 патници тогаш беа погодени од штрајкот.
Германија се соочува со серија штрајкови кои особено го погодуваат транспортниот сектор, но и индустријата и другите услуги. Вработените сметаат дека предложеното зголемување на платите е недоволно со оглед на зголемувањето на цените од 2022 година.