Научниците соопштија дека климатските промени предизвикани од човечки активности двојно ја зголемија веројатноста за повторни поплави во Централна Европа овој месец.
Анализата спроведена од World Weather Attribution, група меѓународни научници, го истражуваше влијанието на климатските промени врз обилните врнежи и поплавите што погодија некои европски земји како Полска, Чешка, Австрија, Романија, Унгарија, Германија и Словачка овој месец.
Анализата е направена од 24 еминентни научници од метеоролошки институции и универзитети во Велика Британија, Полска, Австрија, Чешка, Германија, Шведска, Холандија и САД.
Климатските промени предизвикани од човечки активности двојно ја зголемија веројатноста за поплави во кои животот го загубија 24 луѓе во Централна Европа. Интензитетот на дождот, исто така, се зголеми за седум проценти во регионот поради климатските промени, се наведува во анализата.
Доколку светот продолжи да согорува фосилни горива и порастот на глобалната температура достигне два степени, научниците веруваат дека врнежите слични на оние во Централна Европа ќе станат пет отсто поинтензивни и 50 отсто почести, предизвикувајќи ризик од разорни поплави, а тие предупредија на зголемените трошоци во погодените земји.
Џојс Кимутаи, истражувач на Одделот за климатски промени и животна средина на Институтот Грентам, Империал колеџ во Лондон, рече дека климатските промени влијаеле на врнежите што ја погодија централна Европа.
Според анализата, поплавите можат да имаат долгорочни ефекти и врз осигурителниот сектор.