Јужнокорејскиот претседател Ли Џе-мјунг изјави дека е неизвесно дали Сеул и Вашингтон ќе можат да постигнат договор за царините до 8 јули, рокот што го постави американскиот претседател Доналд Трамп. Ли на прес-конференција нагласи дека преговорите се во тек и дека двете страни сè уште ги разјаснуваат позициите и ги идентификуваат областите на договор.
-Преговорите за царините не беа лесни, но правиме сè што можеме за да постигнеме заемно корисно решение. Тешко е да се каже со сигурност во овој момент дали ќе можеме да постигнеме договор до 8 јули, но сè уште работиме на тоа, рече Ли.
90-дневната пауза на Трамп во спроведувањето на реципрочните царини истекува на 9 јули, што може да доведе до воведување нови даноци за јужнокорејските производи, вклучувајќи автомобили и полупроводници, кои се основа на извозот на Јужна Кореја.
Ли повика на трпение, нагласувајќи дека брзањето со постигнување договор нема да биде во интерес на земјата.
Министерот за трговија на Јужна Кореја, Јео Хан-ку, планира посета на Вашингтон за понатамошни разговори со американските трговски претставници. Осврнувајќи се на Северна Кореја, Ли потврди дека ќе работи на продолжување на разговорите со Пјонгјанг, и покрај длабоката недоверба меѓу Северот и Југот.
Тој нагласи дека Јужна Кореја ќе продолжи со прагматичен пристап кон подобрување на односите со Северна Кореја, а воедно ќе одржува силен сојуз со Соединетите Американски Држави.
-Иако е предизвикувачки, мислам дека треба да се движиме кон подобра координација со Северна Кореја, рече Ли.
Владата на Јужна Кореја веќе презеде чекори за намалување на тензиите со Северна Кореја, вклучително и суспендирање на пропагандните емитувања и забрана за пуштање пропагандни балони.
Ли, исто така, рече дека ги поддржува напорите на Трамп за продолжување на дијалогот со севернокорејскиот лидер Ким Џонг Ун.