Израелската армија работи на проширување на пат во централниот дел на Појасот Газа за да ја олесни воената операција, објави Волстрит џурнал, цитирајќи воени претставници, дополнувајќи дека тоа е пат за кој израелските медиуми пред неколку дена објавија дека го дели северот на Појасот од нејзиниот југ.
Повикувајќи се на истите извори, весникот наведува дека патот на кој работи Израел е дел од неговите напори за преобликување на теренот на Појасот Газа и овозможување на израелската армија слобода на движење и заострување на контролата.
Весникот објаснува дека изградбата и проширувањето на патот се одвива истовремено со воспоставувањето километарска тампон зона во рамки на Појасот Газа, истакнувајќи дека патот што го гради Израел е воен појас што го спречува враќањето на милиони Палестинци.
Според воени претставници цитирани од весникот, израелските воени инженери планираат да ги уништат куќите и зградите долж тој пат во Газа.
Израелскиот Канал 14 откри дека армијата започнала со асфалтирање на пат од источниот дел на Појасот Газа кон неговиот запад, со цел да го одвои северниот дел на Појасот Газа од останатите негови делови, пренесува Ал Џезира. Овој приватен канал, близок до израелското десно крило, во саботата навечер објави дека попречниот пат 794 започнува од населбата Нахал Оза во близина на Појасот Газа и се протега на запад во Појасот речиси до Средоземното Море, прекинувајќи ги патните комуникации во Газа. (МИА)