Генералниот секретар на ОН, Антонио Гутереш синоќа изјави дека е „крајно вознемирен“ од обновените непријателства во Газа и го повтори својот повик за одржлив прекин на огнот, по што апелираше до Израел да ги поштеди цивилите од натамошни страдања.
Тој, исто така, ги повика Израел и Хамас да ги почитуваат своите обврски согласно меѓународното хуманитарно право, изјави портпаролот на ОН Стефан Дижариќ.
Според меѓународното право, цивилите не смеат да бидат намерни или случајни цели и воените операции мора да бидат пропорционални.
Израел вчера повика на масовна евакуација на жителите на јужниот град Кан Јунис, но генералниот секретар кажа дека за нив никаде не е безбедно за заминување и дека имаат многу малку за преживување.
Гутереш повика на непопречена и непрекината помош низ Појасот Газа.
„Генералниот секретар останува длабоко загрижен за ескалацијата на насилството на окупираниот Западен Брег, вклучително и ескалацијата на израелските безбедносни операции, големиот број жртви и апсења, зголемувањето на насилството на (еврејските) доселеници (врз Палестинците) и палестинските напади врз Израелците“, рече портпаролот. (МИА)