Јоав Галант, кој беше разрешен од функцијата министер за одбрана од израелскиот премиер Бенјамин Нетанјаху, ја повика владата да работи на враќање на затворениците од Појасот Газа „живи“ и ја нагласи потребата сите Израелци да служат во војска.
„Наша должност е да ги вратиме заложниците. Мораме да го направиме тоа брзо додека тие се уште се живи“, рече Галант откако беше сменет од функцијата.
Тој додаде дека „сите во Израел мора да служат во армијата“, мислејќи на православните Евреи, кои беа ослободени од задолжителна воена служба додека Врховниот суд не го отфрли ова ослободување во јуни оваа година.
Галант рече дека одлуката за негова смена е поради несогласувања за три прашања, од кои прво е прашањето за воениот рок, бидејќи смета дека секој што е на возраст за регрутирање треба да оди во војска.
Второто несогласување е поврзано со неговото инсистирање за што поскоро враќање на израелските затвореници од Појасот Газа, а тоа е „цел што може да се постигне со одредени отстапки, од кои некои се болни“.
Третото несогласување, рече тој, е поврзано со неговото инсистирање дека мора да се формира официјален орган кој ќе истражува што се случило по 7 октомври 2023 година.
Нетанјаху го објави разрешувањето на Галант во вторникот вечерта, велејќи дека нема доверба во неговата способност да управува со тековните воени операции и дека „недостигот на доверба меѓу нив го направи невозможно водењето на војната на овој начин“.
Во соопштението од кабинетот на Нетанјаху се наведува дека премиерот го назначил министерот за надворешни работи Израел Кац за наследник на Галант, а лидерот на Националната десничарска партија Гидеон Сар за министер за надворешни работи. (МИА)