Во последните денови, израелскиот премиер Бенјамин Нетанјаху постојано изјавува дека бара „целосна“ или „апсолутна“ победа над Хамас додека израелските сили водат борби во Кан Јунис и се подготвуваат за офанзива против Рафа, град во јужниот дел на територијата каде се концентрирани повеќе од 1,4 милиони Палестинци.
Според истражувањето на Израелскиот институт за демократија (ИДИ) – тинк-тенк со седиште во Ерусалим – само 38,3 проценти од Израелците сметаат дека оваа победа е „многу“ или „умерено“ веројатна, а 55,3 отсто ја сметаат за „не многу“ или „многу неверојатна“. Околу 6,4 проценти од испитаниците не се изјасниле.
– Нашата цел е едноставна: победа. Само победата против Хамас ќе ни овозможи да постигнеме нормализација и регионална интеграција, изјави денеска израелскиот министер за одбрана Јоав Галант.
На маргините на разговорите за прекин на огнот предводени од Катар, Египет и САД, регионалните и западните земји разговараат за поширок повоен план за Газа, кој би вклучувал создавање независна палестинска држава и нормализација на односите меѓу Израел и Саудиска Арабија.
И покрај тоа, мнозинството од 612-те анкетирани од ИДИ (55,4 проценти) се против Израел да прифати создавање на „независна и демилитаризирана“ палестинска држава, а околу 37 отсто веруваат дека „ќе има уште поголем тероризам“ доколку се создаде таква земја, според податоците од истражувањето спроведено меѓу 12 и 15 февруари.