Општина Гази Баба и оваа година обезбедува бесплатна униформа за сите ученици од општинските основни училишта кои функционираат на нашата територија.
Проектот за бесплатни униформи на учениците се воведе од минатата учебна година и истото беше ветување во изборната програма на градоначалникот Бобан Стефковски.
Во објава на својата официјална страна на фејсбук, градоначалникот Стефковски ги информираше граѓаните и напиша:
ОБЕЗБЕДУВАМЕ БЕСПЛАТНА УНИФОРМА ЗА СЕКОЈ УЧЕНИК.
Со почеток на учебната 2024 / 2025 година, сите ученици од општинските основни училишта на територија на општина Гази Баба ќе добијат бесплатна униформа.
Овој проект започна да се реализира во општина Гази Баба со моето доаѓање за градоначалник со што го исполнив ветувањето кое го дадов за време на изборите, дека сите ученици ќе добиваат бесплатни униформи.
Со реализацијата на овој проект се намалуваат социјалните разлики што ги има во секое општество и се постигнува чувство на еднаквост меѓу децата, без поделби и разлики меѓу нив во начинот на облекување, а притоа се намалуваат и трошоците на родителите на учениците. – напиша Стефковски.