Албанската министерка за здравство и социјална заштита, Албана Кочиу, објави дека во 36-те летни здравствени амбуланти, за три месеци услуга добиле повеќе од 68.000 туристи.
Од 1 јуни до 31 август, 36-те летни здравствени амбуланти, функционираа од север до југ и гарантираа медицинска услуга 24/7 за сите туристи, локални жители и странци. Од медицинските екипи кои ги сочинуваат 223 лекари и медицински сестри услуга добиле 68.108 туристи, од нив 30 отсто странски, објави Кочиу, додавајќи оти „благодарение на посветеноста на медицинскиот персонал, туристите уживаа во мирна и заштитена сезона“.
– Најголемиот проток на туристи кои добија услуга беше во здравствените амбуланти во Голем, Поградец, Драч, Мали и Робит, Ѓири и Лалзит. Додека најчестите дијагнози беа гастроентеритис, каснувања и алергии, разни вируси и артериска хипертензија, посочи Кочиу.
Амбулантите, долж крајбрежјето и планинските туристички области, почнаа да функционираат на 1 јуни и ќе останат отворени до 30 овој месец. Покрај амбулантите, Националниот ургентен центар стави на располагање 20 фиксни станици за брза помош за туристите во најфреквентните туристички области.