Според календарот на МПЦ (Јулијанскиот календар) денеска е 17 март.
Денеска е Преподобен Алексиј човек Божји.
Овој светител потекнуваше од римско благородничко семејство. Од малечок го имаше засакано Бога со целото срце и со целиот ум. Кога порасна родителите го оженија против неговата волја. Уште првата ноќ тој го напушти домот и жената и се насели како просјак во градот Едеса во Ме-сопотамија.
Таму проживеа 17 години. Кога луѓето ги открија неговите добродетели, за да ги избегне почестите, се качи на брод за Лаодикија. Но, ветрот го одведе бродот близу Рим. Свети Алексиј дојде во домот на родителите, кои му дадоа да живее во една шупа близу куќата, бидејќи не го беа познале.
Таму Алексиј проживеа уште 17 години и мирно се упокои. Кога го открија телото, родителите во неговата рака најдоа едно ливче од кое дознаа дека тоа е нивниот син Алексиј. Тој беше толку близок до Бога, што продолжи да чудотвори и по неговата телесна смрт.
ОД КАТОЛИЧКИОТ КАЛЕНДАР
Велика Сабота
Велика Сабота е ден на тишина и молитва. Верниците ги посетуваат специјално уредените Божји гробови во црквите и капелите. Евхаристиското (мисовно) празнување не се празнува, а во сабота навечер со свечен обред се празнува Велигденското бдение (света или голема ноќ), почетокот на велигденското празнување.
Црковното значење на целото празнување е прекрасно изразено во велигденската химна која го прославува Христовото откупно дело во тајната на воскресението. Тоа е пофална химна на „Воскреснатиот Христос, Кој се врати од мртвите, кој свети на секој човек и живее и владее во вечни векови“.