Собраниската седница за избор на новата влада продолжува утре, а гласањето ќе следи по завршување на претресот, односно најдоцна до полноќ.
Во програмата на идната влада и концептите на партиите кои се дел од новото мнозинство, има сериозни разлики со предизборните ветувања – ова е еден од главните напади на опозицијата во парламентот, во кој се расправа за програмата предложена од Христијан Мицкоски и составот на идната влада на државата.
„Првиот главен приоритет, членството на земјата во Европската Унија, во програмата има сосема поинаков концепт од оној што го презентираше ВМРО-ДПМНЕ како опозиција во последните 8 години. Факт е дека (во програмата) нема збор за откажување од Договорот од Преспа или за раскинување на Договорот со Бугарија. Факт е дека нема план како ќе ја сменат Преговарачката рамка (со ЕУ) за која години наназад велевте дека нема да ја прифатите“, им се обрати на мнозинството координаторот на пратеничката група на СДСМ, Оливер Спасовски.
Исто така опозициските пратеници ги прашаа новите министри дали ќе го користат новото уставно име или не, и дали Владата ќе има прв вицепремиер. Кандидатката за лидер на СДСМ, Славјанка Петровска праша и дали ќе биде укинат „балансерот“.
Согласно Деловникот на Собранието, состанокот на кој ќе се расправа за програмата и составот на Владата може да трае најмногу два дена, а гласањето мора да заврши најдоцна до утре на полноќ. Владата ќе биде избрана доколку за неа гласаат мнозинството од вкупниот број пратеници.
Се претпоставува дека парламентарното мнозинство што се очекува да ја поддржи новата влада во законодавниот дом има 78 пратеници.
Новата влада предложена од Мицкоски ќе брои 24 членови, од кои 20 се со ресор. Христијан Мицкоски како премиер ќе има пет вицепремиери.