Македонија честитка

Стоилковиќ: Ромите се нераскинлив дел од македонското културно наследство

Ден посветен на подигнување на свеста за правата и културата на ромската заедница, но и потсетник дека секој граѓанин без разлика на етничката или верската припадност има еднаква можност да учествува, придонесува и напредува, наведува во честитката Стоилковиќ.

Стоилковиќ: Ромите се нераскинлив дел од македонското културно наследство

Потпретседателот на Владата на Република Македонија и министер за односи меѓу заедниците, Иван Стоилковиќ по повод 8 Април, Меѓународниот ден на Ромите упати честитка до сите припадници на ромската заедница, истакнувајќи дека почитта не е само обврска, туку таа е избор што го правиме секојдневно.

-8 Април, Меѓународниот ден на Ромите е ден кој не е само симбол на борбата на ромскиот народ за еднаквост, слобода и достоинство, туку и ден за сеќавање и ден за надеж. Ден посветен на подигнување на свеста за правата и културата на ромската заедница, но и потсетник дека секој граѓанин без разлика на етничката или верската припадност има еднаква можност да учествува, придонесува и напредува, наведува во честитката Стоилковиќ.

Ромската заедница во Република Македонија, како што посочува Стоилковиќ, е нераскинлив дел од мозаикот што ја прави нашата земја толку богата и шаренолика, а Ромите се нераскинлив дел од македонското културно наследство. Таа е длабоко вкоренета во историјата и развојот на нашата земја, а нејзините членови секојдневно придонесуваат во различни сфери.

-Основната мисија на Министерството за односи меѓу заедниците е да гарантира заштита на правата на етничките заедници, унапредување на меѓуетничките односи и јакнење на културна кохезија во општеството, како и промоција на културните вредности, подигање на свеста за важноста и потребата од почитување на диверзитетите на културните и сите други изразувања. Ќе направиме сѐ што е потребно за интеграцијата на сите заедници и граѓани во македонското општество да не биде само празна фраза, туку и предизвик кој преку континуирана работа, искрен дијалог и вистинска волја ќе значат реализирање на визијата – општество во кое никој не е невидлив, се наведува во честитката.

Министерството за односи меѓу заедниците, како што посочува Стоилковиќ, останува силен поддржувач на ромската заедница, и не само ромската, да биде слушната и вистински вклучена во донесувањето одлуки.

-Сигурен сум дека таквите политики ќе ја потикнат севкупната интеграцијата на македонското општество не само на ромската заедница и дека тоа не значи асимилација, туку меѓусебно прифаќање, разбирање и заедничко градење на иднината. Почитта не е само обврска, таа е избор, избор што секојдневно го правиме со нашите зборови, нашето однесување и нашите политики. А кога ќе го избереме почитувањето, го избираме и човечкото достоинство, истакнува Стоилковиќ.

Тој истакнува дека 8 Април, Денот на ромската заедница треба да биде потсетник дека напредокот се мери не само по економски показатели, туку и по начинот на кој се однесуваме кон најранливите меѓу нас.

-Нека ни биде поука дека различноста е сила, а не пречка. И нека ни биде водилка во создавање општество во кое секој поединец – без разлика на потекло, вера, се чувствува достоен, безбеден и рамноправен. На сите Роми во нашата држава и ширум целиот свет им го честитам 8 Април, Меѓународниот ден на Ромите! Ви посакувам здравје, успех и уште поголема афирмација на потенцијалите на ромската заедница, пишува во честитката Стоилковиќ.

To top