Делегацијата на Собранието на Република Македонија активно учествува на Регионалниот семинар за парламентите на Западен Балкан, кој се одржува на 23 и 24 февруари 2026 година во Подгорица, Црна Гора.
Делегацијата ја сочинуваат Дафина Стојаноска, Саранда Имери Стафаи и Димитар Ковачевски. Семинарот е организиран заеднички од Меѓупарламентарната унија (IPU) и Парламентот на Црна Гора, и е посветен на клучните прашања поврзани со климатските промени и зелената транзиција во регионот.
Во семинарот учествуваат и делегации од Албанија, Босна и Херцеговина, Црна Гора, и Србија, како и европратеникот Томас Вајс (преку видео врска), претставници од извршната власт на Црна гора, академци и меѓунaродни и регионални организации.
Семинарот беше отворен од страна на претседателот на Парламентот на Црна Гора, Андрија Мандиќ. По него, на присутните им се обратија и Дејан Дуровиќ, претседател на Комисијата за туризам, земјоделство, екологија и просторно планирање, Бобан Станишиќ, генерален секретар на Парламентот на Црна Гора и Мартин Чунгонг, генерален секретар на ИПУ кој се обрати преку видео врска. Работата на семинарот се одвиваше во сесии, со презентации и во интерактивна форма.
Претставниците на Собранието имаа активно учество во интерактивната дебата во текот на сите сесии на Семинарот, со конкретни ставови, споделувајќи национални искуства и придонесувајќи конструктивно кон регионалниот дијалог за предизвиците на климатската политика и зелената транзиција.
Првата сесија беше посветена на тековните и проектираните влијанија на климатските промени врз Западен Балкан, со посебен акцент на економските, социјалните и еколошките ризици. Разгледани беа конкретните последици по земјоделството, управувањето со водите и инфраструктурата, како и улогата на парламентите во зајакнување на отпорноста и адаптацијата.
Втората сесија беше насочена кон зајакнување на капацитетот на пратениците ефективно да комуницираат со граѓаните за климатски предизвици и последици. Дискутирано беше како да им се спротивстават на дезинформациите и за начините за вклучување на граѓаните и засегнати страни во конструктивни дијалози за климатска акција.
Исто така, беа презентирани стратегии за јасна комуникација до различни публики, градење на јавната доверба и адресирање на загриженоста, поврзани со економијата, работните места и цената на енергијата.
Третата сесија ги истражуваше начините на кои декарбонизацијата и климатската акција во Западен Балкан можат да промовираат и поддржат економски и одржлив развој, како и да ја зајакнат регионалната и пазарната интеграција со ЕУ.
Истакната беше стратешката улога на парламентите во усогласувањето на националното законодавство со рамките на ЕУ и глобалните климатски рамки, како и во надзорот на процесот за праведна и зелена транзиција. Семинарот, кој продолжува на 24 февруари 2026 со теренска посета, претставува важна платформа за размена на искуства, стручна комуникација и регионална соработка меѓу парламентите на Западен Балкан во областа на климатската политика и зелената транзиција.