Семејство, со две мали деца, било заглавено во снегот на патот пред хотел Радика, во близина на село Леуново. Спасувачките екипи веднаш реагирале и според информациите семејството е безбедно и се наоѓа пред хотелот, додека чека да се расчисти патот, за да може да го напушти местото. Поради обилните снежни врнежи и снежната покривка која достигнала околу 80 сантиметри, состојбата на патот била отежната.
Од центарот за управување со кризи информираат дека на патот кај Мавровско езеро имало паднати дрвја, што дополнително го отежнувало расчистувањето.
Од центарот за управување со кризи препорачуваат внимателност при движењето во овие подрачја. ЈП за одржување на магистрални и регионални патишта „Македонија пат“, со сите расположливи екипи врши расчистување на државните патишта кои според информациите од терен, се проодни за сообраќај.