Во Македонската филхармонија во Скопје во организација на Министерството за одбрана и Генералштабот на Армијата вечер ќе се одржи предновогодишен концерт на оркестарот на Армијата со музичари од оркестрите на Вооружените сили на Франција, Унгарија, Италија и САД.
Како што информираат од МО, на концертот, кој оваа година се изведува под мотото „Заедно посилни во хармонија на звуците“, ќе се изведе репертоар од различни нумери од познати светски автори: Жорж Бизе, Јоханес Брамс, Џорџ Гершвин и Џоакино Росини, како и повеќе нумери од познати композитори од земјите на оркестрите.
-На предновогодишниот концерт ќе присуствуваат претседателката и врховен командант Гордана Сиљановска Давкова, министерот за одбрана Владо Мисајловски, началникот на Генералштабот на Армијата генерал-мајор Сашко Лафчиски, министри во Владата, пратеници во Собранието на Република Македонија, претставници на дипломатскиот и воено-дипломатскиот кор, активни и пензионирани генерали на Армијата, припадници на Министерството за одбрана, Генералштабот и командите на Армијата и други гости, се вели во денешното соопштение од Министерството за одбрана.
Оттаму додаваат дека оркестарот на македонската Армија, во духот на соработката, со оркестрите од сојузничките армии веќе неколку години одржуваат заеднички концерти.