Единствената македонска партија, Македонска алијанса за европска интеграција (МАЕИ) упати повик до Македонците кои живеат надвор од границите на Албанија да го искористат своето право на глас и да го поддржат македонскиот глас на парламанетарните избори што ќе с еодржат на 11 мај.
-Вашиот глас е клучен за зајакнување на македонската заедница во Албанија и за поддршка на политичката програма на МАЕИ, која се залага за заштита на македонскиот идентитет, култура и права. Со секој ваш глас, ја гарантирате иднината на Македонците во Албанија и го продолжуваме нашето заедничко патување кон европска интеграција. Не дозволувајте вашиот глас да остане неслушнат! Регистрирајте се и гласајте за Македонска алијанса за европска интеграција – вашата сила за посветла иднина, повикува МАЕИ.
Исто така во повикот стои дека овие избори за првпат имаат можност да гласат од странство преку пошта.
-Процесот на регистрација за гласање е веќе отворен и се врши преку Националната платформа на Централната изборна комисија. За регистрацијата ви е потребен електронски уред (паметен телефон, лаптоп, компјутер со предна камера) за верификација преку фотографирање на лицето за регистрација и скенирање (фотографирање) на идентификацискиот документ и другиот документ за потврда на адресата, стои во повикот на партијата, во кој детално се објаснува начинот на аплицирање.
Аплицирањето за остварување правото на глас на албанската дијаспора почна на 11 овој месец и ќе трае до 4 март. Посебна комисија, која работи 24/7 ги разгледува пријавите и во рок од пет дена апликантот добива одговор дали е прифатена или одбиена. До вчера за гласање се пријавиле 14 261, а прифатени се барањата на 2 352 лица.