Министерот за култура и туризам Зоран Љутков, денеска во Загреб остварил билатерална средба со министерот за туризам и спорт на Хрватска Тончи Главина, со што ја почна дводневната работна посета на Хрватска.
На средбата, како што соопшти Министерството за култура и туризам, која поминала во пријателска и конструктивна атмосфера, биле разменети мислења за развојот на туризмот и унапредување на соработката меѓу двете држави.
Министерот Љутков ја истакнал одличната соработка меѓу двете пријателски држави, чии влади си даваат меѓусебна поддршка во сите области, вклучително и во областа на културата и туризмот.
Македонскиот министер, пред својот хрватски колега ја презентирал трансформацијата на Министерството за култура, кое од оваа година го интегрираше и сегментот на туризмот, нагласувајќи ги приоритетите во работењето кои се во насока на развој на културен туризам – манастирски, спортски туризам и слично.
– Министерот Љутков истакна дека имаме ресурси и желба да го развиваме туризмот кај нас, а искуствата на Хрватска, како една од водечките земји во областа на туризмот во светски рамки, ни се драгоцени и се од голема полза и значење за развој и поттикнување на македонскиот туристички потенцијал. Љутков го информираше својот хрватски колега за македонскиот Културно-информативен центар во Загреб, за кој е предвидено својата надлежност да ја прошири и во областа на туризмот и образованието, се наведува во соопштението.
Министерот Главина на средбата го презентирал начинот на функционирање на системот и управувачката рамка во областа на туризмот во Хрватска, каде што има шест закони кои ја засегаат оваа значајна област.
Хрватскиот министер истакнал дека нашата држава има автохтона понуда и ценовна конкурентна предност што треба да ја искористиме. Тој информирал дека во овој момент, Хрватска спроведува реформа на управувањето со туризмот, при што нивен фокус е развојот на одржливиот туризам, како и засилувањето на квалитетот на понудата и позиционирањето на Хрватска како дестинација за цела година.
Министерот Главина, како што е наведено во соопштението, рекол дека размената на искуствата и знаењата во оваа област, за нив е исклучително важна и, како што нагласил, „затоа сме среќни што отворивме низа теми кои можат да придонесат за јакнењето на туризмот во нашите земји“.
Соговорниците се согласиле дека е потребно активирање на Мешовитата комисија од областа на туризмот, која ќе биде одлична можност за споделување искуства и размена на практики во туристичката сфера.
Во рамките на посетата на Хрватска, министерот за култура и туризам Љутков денеска остварил билатерална средба и со хрватската министерка за култура и медиуми, Нина Обуљен Коржинек, со која разговарале за можностите за унапредување на македонско-хрватските културни врски.
Во текот на утрешниот ден, заедно со директорката Мими Ѓоргоска-Илиевска, ќе ги посети македонскиот Културно-информативен центар во Загреб и местото каде што е закопан Панко Брашнаров, а вечерта во Концертната сала „Лисински“ ќе присуствува на концерт на Ансамблот за народни игри и песни „Танец“.