Независниот Синдикат на професионални војници на Македонија го разобличи дејствувањето на Александар Насковски, претседател на Синдикатот СО.
Откако пред неколку дена тој излезе во јавност со неосновани обвинувања, вистината за него и неговите потези излезе на виделина.
-Нема шанси Александар Насковски да е криминалец бидејќи тој е најголемиот манипулатор во денешницата. Најголемиот криминалец против кого досега има синдикатот покренато пријави за злоупотреба на службена должност, потпис и печат. Времето ќе покаже кој беше вистинскиот Александар Насковски кој во име на Синдикализмот издејствува да прибави парични средства за негова лична корист. Можеби правдата е бавна, но стигнува, порачуваат од Синдикатот.
Тие денес на социјалните мрежи објавија дел од кривичните пријави кои се поднесени за ова лице. Според документите, против Насковски се поднесени кривични пријави за злоупотреба на должност, злоупотреба на финансиски средства и злоупотреби на печатите.
Како што објавуваат од Независниот синдикат, Насковски исто така имал поднесено кривични пријави, кои од страна на обвинителството се одбиени. Велат дека тој поднесувајќи кривични пријави неосновано, има за цел да се отстрани вниманието на вработените во МО и АРМ поради неговите нелегални постапки.
КУРИР пред два дена објави дека против ова лице се поднесени неколку кривични пријави, по што тој испрати демант во кој ништо од обвинувањата кон него, всушност, не демантира. Очигледно е дека фатен во тесно се обидува да ја префрли темата за тешките кривични дела кои му се ставаат на товар, па тера политика. Во реакцијата, тој користи закани, поставува прашања за изминативе 35 години и со констатациите кои ги објавува само докажува дека неговата мисија не е да се бори за добробит на војниците, туку за лична корист.
Имено, како што дознава КУРИР, против Александар Насковски се поднесени неколку кривични пријави. Една од овие кривични пријави, кои може да докаже сериозна вмешаност во кривични дела и незаконско стекнување со материјална корист, ја има поднесено токму министерството за одбрана, преку овластено лице лично министерот за одбрана Владо Мисајловски.
Од таму е јасна желбата на Насковски по секоја цена, без ниту еден основан аргумент, да се заканува, да поставува нелогични прашања и да пласира неразумни тези.
Да потсетиме, кривичната пријава против Насковски е поднесена за неколку кривични дела и тоа: измама, фалсификување на исправа и употреба на исправа со невистинита содржина, како и неовластено користење и злоупотреба на лични податоци.
Како што дознава КУРИР, кривичната пријава е поднесена „затоа што постои основано сомнение дека Александар Насковски во временскиот период од април до ноември 2023-та година прибавил значителна материјална корист во вкупен износ од 551.500,00 денари на штета на Министерството за одбрана, со однапред создаден план, со директна умисла и со јасна намера за стекнување ваква противправна имотна корист, при што извршил повеќе противправни дејствија“.
Се наведува во кривичната пријава дека ова лице невистинито го известило министерството дека е направена промена во жиро сметка и побарал средствата по основ на членарина да се исплаќаат на таа сметка.
Како што е наведено, пријавениот без согласност од членството и без прибавување пристапници, спротивно на закон, формирал нов синдикален огранок во рамки на друг синдикат, со ист назив како претходниот.
Како што дознава КУРИР, оваа кривична пријава не е единствената со која се соочува Насковски. Против него се поднесени кривични пријави и од име на други синдикати. Тоа денес го потврдија и од другите синдикати.
КУРИР дојде до сите спомнати кривични пријави против Насковски, но засега истите нема да ги објавиме, поради заштита на постапката.