Има група амбициозни луѓе кои се опседнати со здравје и вежбање и притоа го фалат невообичаениот и контроверзен метод за билдање мускули – пиење мајчино млеко.
„Ако сакам да се подобрам и да бидам најдобар што можам, ќе јадам како бебе“, вели Џејмсон Ритенур од Јужна Каролина, бодибилдер аматер кој го добива мајчиното млеко преку донаторка со која стапил во контакт преку Facebook. Ритенур тврди дека неконвенционалниот додаток во исхраната му помогнал да ги ослободи телесните масти додека ги одржувал мускулите, пренесува Insider.
„Би рекол дека витамините од мајчиното млеко навистина помогнаа“, вели тренерот на Ритенур, објаснувајќи дека тој лично го следел неговиот напредок уште пред да започне со методот.
Зборувајќи за овој тренд, спортскиот диететичар Брајан Сент Пјер изјави за Men’s Health: „Мислам дека идејата зад пиењето мајчино млеко за раст на мускулите е дека има неверојатно високо ниво на калории и хранливи материи и има некои дополнителни здрави работи во него. Мајчиното млеко има сè што ви треба за да го натера вашето бебе да расте брзо, па можеби луѓето мислат дека сличен ефект ќе се случи и кај возрасните?”
Што е со научните докази?
Сепак, доказите за придобивките од мајчиното млеко за градење на телото недостигаат до ден-денес, а целата приказна сè уште се базира на анегдоти.
И покрај тоа што е вредно за развојот на доенчињата, тоа не е особено вредно за спортистите, според Брус Герман, професор по исхрана и хемија на Универзитетот во Калифорнија, Беркли. Тој додаде дека нутритивниот состав на мајчиното млеко не е воопшто добро избалансиран за возрасен, со ниска содржина на протеини, висока содржина на заситени масти и многу несварлива лактоза.
Не само тоа, туку човечкото млеко често се купува преку сомнителни извори, со што се зголемува веројатноста за контаминација, пишува Men’s Health.
„Мајчиното млеко генерално не е регулирано – ако жената има ужасна исхрана, мајчиното млеко ќе биде со слаб квалитет“, вели Марк Халперн, нутриционист во Солт Лејк Сити. „И болестите како ХИВ може да се пренесат преку мајчиното млеко.“
Навистина, една студија на Nationwide Children’s Hospital покажа дека од 101 примерок мајчино млеко купени преку интернет, 75 отсто содржеле штетни патогени, додека 10 отсто биле намерно измешани со кравјо или вештачко млеко.