Репрезентацијата на Франција е последниот полуфиналист на Светското првенство во ватерполо, откако вечерва извојува сензационална победа над Унгарија од 11-10.
До најголемата победа во својата ватерполо историја Франција ја предводеше Томас Верно, кој при резултат 10-10 беше прецизен на три секунди пред крајот на четвртфиналниот дуел во Доха.
Противник на Франција во полуфиналето ќе биде Хрватска, која претходно вечерва ја совлада во четвртфиналето Србија со 15-13.
Вториот полуфинален пар го сочинуваат Шпанија и Италија.
Шпанците во четвртфиналето беа поуспешни од Црна Гора (15-12), а Италија во драматичен натпревар ја совлада Грција (11-10).
Полуфиналните натпревари на Светското ватерполо првенство се на програмата в четврток. (МИА)