Српската тениска легенда, Новак Ѓоковиќ, му оддаде почит на швајцарскиот ветеран Стен Вавринка кој го одигра последниот свој меч во кариерата на Отвореното првенство на Австралија, нарекувајќи го „пријател, достоен ривал и инспирација“.
Вавринка објави дека сезоната 2026 ќе му биде последна во кариерата, па ова му беше збогување со турнирот на кој во 2014 година ја освои првата гренслем титула.
„Горд сум што можам да го наречам пријател и ривал, и некој што дефинитивно ме инспирираше. Немам зборови за неговата долговечност, за неговата посветеност на играта“, рече Ѓоковиќ на прес-конференција.
„Да го гледаме како се бори повеќе од четири часа во втората рунда, начинот на кој го сврте натпреварот е доказ за неговата кариера. Неговото наследство дефинитивно ќе живее со многу различни помлади генерации кои го почитуваат. Тој е голем шампион на и надвор од теренот. Многу симпатична личност. Сè направи на вистинскиот начин и ги заслужи сите аплаузи што ги доби на овој турнир. Кога ќе си замине, тенисот ќе изгуби одличен играч и одлична личност“, изјави Ѓоковиќ.