Дерби пресметката меѓу Челси и Манчестер Сити ги задоволи сите сладокусци на Премиер лигата и воопшто на фудбалската игра, бидејќи во еден отворен и спектакуларен меч, голови паѓаа како на лента.
Сити три пати водеше и имаше предност од 0:1, 2:3 и 3:4, но на крајот Челси ги постави конечните 4:4 со гол на Кол Палмер во судиското продолжение, нешто што всушност го намирисал Пеп Гвардиола.
Шпанскиот стратег обелодени дека не останал мирен и после четвртиот гол на Родри кој беше постигнат во 86-та минута, а ја откри и конверзацијата која ја имал со својот помошник.
– Кога Родри постигна гол, му искоментирав на Хуанма дека ќе се случат уште многу работи до крајот на натпреварот. На крајот се случија многу работи и примивме гол. Можеше да биде подобро, но можеше да биде и полошо за нас. Ова беше добра реклама за Премиер лигата. Тесен меч, возбудлив до самиот крај. Тие стартуваа подобро, креираат нешто ново и имаат навистина добри нови играчи. Можеби резултатите не им одеа во прилог, но имаат квалитет. Ние имавме свои моменти, тие имаа свои моменти. Среќно постигнавме гол за 4:3 и после тоа немавме перфектни одлуки. Тоа е што е, не притиснаа и мислам дека конечниот резултат е фер за двата тима, – изјави Пеп.
Foto:twitter.com/ManCit