Раководството на Европската фудбалска асоцијација (УЕФА), предводено од претседателот Александер Чеферин, организираше состанок со претседателите и генералните секретари на 55. членки на европската асоцијација.
Состанокот се одржа во францускиот град, Кан, каде Македонија беше претставувана од претседателот на ФФМ, Муамед Сејдини и генералниот секретар, Наталија Божиновска-Илиевска.
На заедничката работлиница се дискутираше за новостите во фудбалот и во националните тимови, вклучувајќи го и неодамна завршеното Европско фудбалско првенство. Беа опфатени теми за централизација на правата за идните национални натпреварувања и користењето на програмата „Хет-трик“.
Што се однесува до клупскиот фудбал, се разговараше за новиот формат во сите натпреварувања, како и за распределбата на финансискиот колач за клубовите.
Раководните луѓе на УЕФА со колегите од асоцијациите – членки дискутираа и за кандидатите за организација на идните Светски првенства кои ќе се одржат во Шпанија, Мароко и Португалија во 2030 и во Саудиска Арабија во 2034 година.